Аб сустрэчы Генконсула Р.Варанкова з Сакратаром партыйнага камітэта і Старшынём Народнага камітэта правінцыі Дангнай
12.09.2024 г.
12 верасня 2024 г. адбылася сустрэча Генеральнага консула Рэспублікі Беларусь у г. Хашыміне Руслана Варанкова з Сакратаром партыйнага камітэта правінцыі Дангнай Камуністычнай партыі В'етнама Нгуен Хонг Лінем, а таксама Старшынём Народнага камітэта гэтай правінцыі Во Тан Дыкам.
У ходзе сустрэчы з удзелам кіраўніцтва структурных падраздзяленняў Народнага камітэта суразмоўцы акцэнтаваліся на перспектыўных напрамках развіцця супрацоўніцтва паміж Беларуссю і правінцыяй Дангнай, у першую чаргу, з улікам яе спецыялізацыі на прамысловай вытворчасці.
У прыватнасці, бакі дамовіліся разгледзець пытанне ўстанаўлення братэрскіх сувязей правінцыі з адным з прамысловых цэнтраў Беларусі, а таксама аб сумеснай падрыхтоўцы кадраў для в'етнамскіх прадпрыемстваў і навуковым супрацоўніцтве на базе спецыялізаваных беларускіх і в'етнамскіх ВНУ.
Беларускі дыпламат адзначыў гатоўнасць удзелу кампаній Беларусі ў рэалізацыі інфраструктурных праектаў на тэрыторыі правінцыі, уключаючы пашырэнне сеткі шашэйных дарог і будаўніцтва найбуйнейшага ў В'етнаме аэрапорта «Лангтань» са штогадовым пасажырапатокам да 100 млн чалавек і перавалкай да пяці млн тон грузаў.
Кіраўніцтва правінцыі Дангнай, у сваю чаргу, выказала надзею на паглыбленне кантактаў паміж бізнес-коламі дзвюх краін, а таксама на развіццё тавараабароту таксама ў сферы сельскай гаспадаркі.
